Тропари Святителям

218. Николаю, архиеп. Мир Ликийских, чудотворцу, глас 4:

Правило веры и образ кротости, / воздержания учителя / яви тя стаду твоему, / яже вещей истина: / сего ради стяжал еси смирением высокая, / нищетою богатая, / Отче священноначальниче Николае / моли Христа Бога / спастися душам нашим.

219. Тому же святому (Перенесение мощей), глас 4:

Приспе день светлаго торжества, / град Барский радуется, / и с ним вселенная вся ликовствует / песньми и пеньми духовными: / днесь бо священное торжество / в пренесение честных и многоцелебных мощей / святителя и чудотворца Николая, / якоже солнце незаходимое, возсия светозарными лучами, / разгоняя тьму искушений же и бед / от вопиющих верно: / спасай нас, яко предстатель наш великий, Николае.

220. Тому же святому (Рождество), глас 4:

Чудное и славное рождество твое, святителю Николае, / Церковь днесь православных светло празднует, / ибо стоянием ногу твоею / яви тя Господь и провозвести быти светильника и учителя миряном, / весь мир обогащающа и просвещающа чудесы. / Тем вопием ти: / моли Христа Бога спастися душам нашим.

221. (Иконе свт. Николая «Зарайская»), глас 4:

Пресветлый храме Святаго Духа, / Богомудре отче Николае, / благодатию небес освяти души наша, / заступи и покрый всечестным твоим омофором, / его же приял еси от рук Пречистыя Девы, / и просвети нас светом заповедей Христа, /от Него бо приял еси глаголы жизни. / Моли благость Отца Небеснаго, / во еже спастися / православно чтущим тя, / даруя нам велию милость.

222. (Перенесение Великорецкой иконы свт. Николая из Вятки в Москву), глас 3:

Яко драгоценное богатство, / прииде к нам от Великия реки Вятки / в царствующий сей град наш Москву / честная икона образа твоего, святителю Николае, / и многая убо чудеса в пришествии своем сотвори, / болящия исцели и вся человеки удиви./ Сего ради повелением самодержца царя / списася с нея сия честная икона твоя / на просвещение и моление всем людем царска града, / юже днесь зрим и покланяемся ей, / моляще тя, тайнника Христова: / моли, святе, о всех нас, / даровати нам мир и велию милость.

223. Собору Вселенских учителей и святителей Василию Великому, Григорию Богослову и Иоанну Златоустому, глас 4:

Яко апостолов единонравнии / и вселенным учителие, / Владыку всех молите / мир вселенней даровати / и душам нашим велию милость.

224. Святителям Московским: Петру, Алексию, Ионе, Филиппу и Ермогену, глас 4:

Первопристольницы Российстии, / истинии хранителие апостольских преданий, / столпи непоколебимии, Православия наставницы, / Петре, Алексие, Ионо, Филиппе и Ермогене, / Владыку всех молите / мир вселенней даровати, / и душам нашим велию милость.

225. Алексию, митр. Московскому и всея России, чдтв., глас 8:

Яко апостолам сопрестольна и врача предобра, / и служителя благоприятна, / к раце твоей честней притекающе. святителю Алексие богомудре, чудотворче, / сошедшеся любовию в память твою светло празднуем, / в песнех и пениих радующеся и Христа славяще, / таковую благодать тебе Даровавшаго исцелений / и граду твоему великое утверждение.

226. Тому же святому,(Обретение мощей), глас 2:

Яко сокровище пребогатое, многодетно в земли сокровенное, / честныя мощи твоя обретошася чудоточащия, / всеблаженне отче святителю Алексие: / от нихже врачевство приемлюще, обогащаемся / и Христа славословим, глаголюще: / слава прославляющему святыя Своя.

227. Амфилохию, еп. Владимира Волынского, глас 4:

От мирскаго мятежа изшед, / в пещерах Киевских Феодосия блаженнаго Богомудренно вселился еси. / святителю Христов, отче Амфилохие, / и отсюду во епископа Богоспасаемей пастве Владимиро-Волынстей поставленный, / в трудех, бдениих и пощениих свято подвизался еси. / И тако достиг добродетелей совершенства, / паки в пещеры святыя возвратился еси, / идеже и дух свой благочестно предал еси Господеви, всечестне, / к лику преподобных Печерских причтен, / с ними же молися Христу, всечестне, / спастися душам нашим.

228. Андрею, архиеп. Критскому, глас 1:

Христову Церковь цевницею языка твоего, / песнословя умильно, возвеселил еси, / богословием же Препетыя Троицы / славу всем сказал еси ясно, / тем тя, яко тайноглагольника, поем, / Андрее, пастырю Критский, / и величаем память твою, / Христа славяще дивнаго во святых Своих.

229. Антонию Вологодскому, глас 4:

Иже от юности, Богомудре, возследуя Христу, / во бдениих и в пощениих пребывая, / и паству, от Бога дарованную ти, добре пасый, / и учений Божественных исполняя, и в жизненный путь наставляя: / отнюду же и архиерейства саном почтеся, / Церковь и люди возвеселил еси; / и по преставлении своем чудес лучи испущаеши, / недугом с верою приходящим к тебе исцеление подая, / и слепу младенцу свет дарова, / угодниче Христов, святителю Антоние, / предстоя Престолу Христову с лики Ангельскими, / с нимиже моли Его о нас, притекающих к тебе / получити от него оставление грехов и велию милость.

230. Арсению, архиеп. Сербскому, глас 8:

Милости наставниче и благоутробия сокровище, / еже всем отверзл еси, / правоверия учителю и архиереев Божественное удобрение, / отче наш, иерарше Арсение, / нищих был еси заступник: / тем моли Христа Бога, / просветити души наша, да не когда уснем в смерть.

231. Арсению, еп. Тверскому, глас 8:

Благочестно пожив во святительстве, / люди просветил еси учением твоим, / и о храме Пречистыя вельми подвизався, / и любитель монахов быв, / сего ради от Христа паствы твоей венец приял еси. / Темже, яко апостольского престола наместника, / и святителя великаго чтуще тя, молим чада твоя, блаженне: / от всех бед избави нас яже ко Христу молитвами твоими, / святителю Христов Арсение отче наш.

232. Тому же святому (Перенесение мощей), глас 1:

Божественною свыше просветився благодатию, святителю, / и многим терпением во временней жизни подвиг совершил еси. / Темже источаеши чудес благодать / иже с верою приходящим к честней ране мощей твоих, Арсение преблаженне. / Мы же вопием ти: / слава Давшему ти крепость, / слава Венчавшему тя, / слава Действующему тобою всем исцеления.

233. Афанасию Великому, архиеп. Александрийскому, глас 3:

Столп был еси православия,/ Божественными догматы подтверждая Церковь, / священноначальниче Афанасие: / Отцу бо Сына Единосущна проповедав, / посрамил еси Ария. / Отче преподобне, / Христа Бога моли / даровати нам велию милость.

234. Афанасию, патриарху Цареградскому, глас 1:

Чистоты жития светом страстное терние попалил еси / и течением слез безплодную землю напоил еси, / многоплодну ниву душевную соделав, / Афанасие преблаженне, / светило Царюграду, Патриархом удобрение, / моли Христа Бога спастися душам нашим.

235. Афанасию, патриарху Цареградскому, Лубенскому чудотворцу, глас 8:

Премудростию учений твоих царствующий град просветив, / тьму неведения еретического разгнал еси, преблаженне; / твое благословение земли Российстей принесл еси, / отче наш, святителю Афанасие, / идеже скончав течение твое, / на крилех чистоты возлетел еси в Небесное Царство. / Моли Христа Бога непрестанно о душах наших.

236. Варсонофию, еп. Тверскому, глас 3:

Возвестителю пути спасительного, / истинный хранителю апостольских преданий, / столпе непоколебимый, благочестия учителю / и Православия наставниче, святителю Варсонофие, / Владыку всех моли / мир вселенней даровати / и душам нашим велию милость.

237. Василию Великому, архиеп. Кесарии Каппадокийской, глас 1:

Во всю землю изыде вещание твое, / яко приемшую слово твое, / имже боголепно научил еси, / естество сущих уяснил еси, / человеческия обычаи украсил еси, / царское священие отче преподобне, / моли Христа Бога / спастися душам нашим.

Величание:

Величаем тя, / святителю Христов Василие, / благочестно Церковь Христову сохраншаго.

238. Василию, еп. Захолмскому (Серб.), глас 4:

От юности твоея всего себе Господеви отдал еси, / пребывая в молитвах, трудех и постех, отче Богоносне, / образ был еси добродетели твоему стаду; / сего ради видя Бог твое благое произволение, / поставляет тя Своей Церкви пастыря и добраго архиерея / и по преставлении твоем соблюде святое тело твое нерушимо, святителю Василие. / Темже, яко имея дерзновение, / молися Христу Богу / спастися душам нашим.

239. Василию Кинешемскому, глас 8:

Днесь колена разслаблена укрепляются, / изнемогшия руце на молитву простираются, /очеса умилением орошаются, / слухи же псалмы и песньми оглашаются, / се бо к нам во славе приходит Христов свидетель верный, / Василий Царственный и Всеблаженный, / лжи и злобы победитель, Златоустов подражатель и веры ревнитель, / темже образ подает верным спасения, / и молится о иже верою и любовию чтущих память его.

240. Василию, еп. Рязанскому, глас 4:

Первее в Муроме святительством почтен был еси, / из негоже неправедно изгоняемь, / на мантию, яко на легкий корабль, возшел еси, / на немже паче естества, яко безплотен, / по водам шествие творя, / промышлением Вышняго и заступлением Богоматере управляемъ / богоспасаемого града Рязани достигл еси /и в нем, архиерейства престол восприим, / богоданную паству рязанскую добре упасл еси, / святителю отче наш Василие, / моли Христа Бога спастися душам нашим.

241. Геннадию, архиеп. Новгородскому, глас 5:

Уподобился еси древним отцем,/ святителю отче Геннадие, / Священныя Книги собрав и еретики посрамив, / ревность по Бозе показуя, паству оградил еси, / моли и ныне Христа Бога / мир Церкви даровати / и спастися душам нашим.

242. Герасиму, еп. Великопермскому, Устьвымскому, глас 3:

Божественныя веры проповеданием / землю Зырянскую озарил еси / и ко Христу люди многая привел еси. / Возопиет же с тобою и Авель ко Господу / и Захариина кровь праведная, / отче Герасиме, моли Христа Бога / пастве твоей и всем, любовию память твою совершающим, / даровати велию милость.

243. Герасиму, Питириму и Ионе, епп. Великопермским, Устьвымским, глас 8:

Равноапостольному святителю Стефану наследовавший / и Православия светом страну Зырянскую озарившии, / святителие Христовы Герасиме, Питириме и Ионо, / Престолу Пресвятыя Троицы ныне предстояще, / молитеся пастве вашей от врагов ненаветованней быти / и всем православным людем в мире спастися.

244. Герману, архиеп. Казанскому, глас 4:

От юности иго Христово усердно восприимь, / бденными подвиги поста и молитвы прославился еси. / Отонудуже призывающу тя Богу на служение Церкви в новопросвещеннем царстве Казанстем, / вкупе со святителем Гурием воззван был еси, / идеже яко первоначальник созданной тобою во граде Свияжске обители и достойный первосвятителю преемник явился еси. / Духом предстоя престолу Владычню, молися, святителю Германе, со святителем Гурием / Православней пастве во благочестии преспевати, тьме иноверия светом веры разгнатися.

245. Геронтию, митр. Московскому и всея Руси, глас 6:

Днесь душа всяка веселится / на память успения святителя Христова Геронтия, / премудрости ревнителя / и кротости учителя, / смирению наказателя, / учением Божественных словес верныя насладившаго. / Русскаго митрополита похвалим, / святительства паству приимшаго, / украсившаго Церковь Христову. / Тем и Христос видя твое благопроизволение, / причте тя в лик праведных, / святителю Геронтие, / моли Христа Бога и Пречистую Богородицу / непрестанно о всех нас.

246. Григорию Богослову, архиеп. Константинопольскому, глас 1:

Пастырская свирель богословия твоего / риторов победи трубы / якоже глубины духа изыскавшу, / и доброты вещания приложишася тебе. / Но моли Христа Бога, отче Григорие, / спастися душам нашим.

247. Григорию Двоеслову, папе Римскому, глас 4:

Иже от Бога свыше Божественную благодать восприем, / славне Григорие, / и Того силою укрепляема / евангельски шествовати изволил еси. / Отонудуже у Христа возмездие трудов приял еси, всеблаженне, / Егоже моли, / да спасет души наша.

248. Григорию Паламе, архиеп. Фессалонитскому, глас 8:

Православию наставниче, святителем украшение, / Богословцем поборниче непобедимый, Григорие чудотворче, / Солуню великая похвало, проповедниче благодати, / моли Христа Бога спастися душам нашим.

249. Григорию Чудотворцу, еп. Неокесарийскому, глас 8:

В молитвах бодрствуя, чудес деланьми претерпевая, / тезоимение стяжал еси исправления; / но молися Христу Богу, отче Григорие, / просветити души наша, / да не когда уснем в смерть.

250. Гурию, архиеп. Казанскому, глас 4:

Правило веры и образ целомудрия, / учителя добрых дел / и наставника спасения даде тя Господь / новопросвещенному граду Казани, / в немже приобрел еси новыя от язык люди / и привел еси я Христови. / Сего ради в память твою радостно сошедшеся, / честне празднуем святое твое успение, / ты же, отче наш, святителю Христов Гурие, / моли Христа Бога / спастися душам нашим.

251. Тому же святому (Перенесение мощей), глас 4:

Яко крин благовонный, / мироточивыя твоя мощи / от вертограда Церкве Спасовы / в вертоград Церкве Богородичны честне принесошася, / святителю Гурие, / яко же бо дар честен, / тя даровав Христос Пречистей Матери Своей, / и исполнися храм Ея святый благоухания твоего, / и возрадовася архиерейский престол, / приемый тя, первоседателя своего. / Возвеселися же собор верных со святителем и священноначальники / о преславном цельбоносных твоих мощей пренесении, / еже мы радостно празднующе, молим тя, / угодниче Божий: / моли Христа Бога / подати душам нашим мир и велию милость.

252. Гурию, архиеп. Казанскому и Варсонофию, еп. Тверскому (Обретение мощей), глас 3:

Первии учителие прежде темному, / ныне же светлому и новопросвещенному граду Казани, / первии возвестителие пути спасительнаго, / истиннии хранителие апостольских преданий, / столпи непоколебимии, благочестия учителие / и Православия наставницы, Гурие и Варсонофие, / Владыку всех молите / мир вселенней даровати и душам нашим велию милость.

253. Даниилу, архиеп. Сербскому, глас 3:

Чудо явися извещения, / делами добродетелей Божиих возсиял еси, / монашествующих лики упасл еси, / архиерейская седалища утвердил еси, / еретическаго нападения не усумневся, / Церковию Христовою управляя, / преподобне отче, Данииле премудре, / умер, яко спя, / тело же твое цело и нетленно соблюдено бысть, / и подает цельбы болящим от различных недугов, / и демоны прогоняет. / Сего ради молим тя: моли спастися душам нашим.

254. Димитрию, митр. Ростовскому, глас 8:

Православия ревнителю и раскола искоренителию, / Российский целебниче и новый к Богу молитвенниче, / списаньми твоими буих уцеломудрил еси, / цевнице духовная, Димитрие блаженне, / моли Христа Бога спастися душам нашим.

255. Димитрию, митр. Ростовскому, Митрофану и Тихону, епп. Воронежским, глас 8:

Яко же древле на Востоцех трие велицыи святителие, / сильный словом Василий, / глубина Богословия Григорий и Златоустый Иоанн, / тако и днесь в стране полунощней / три новоявленная светила веры на тверди церковней востекоша: / столп веры Митрофан, / слово истины в лице царю исповедавый, / и обличитель раскола Димитрий, / мечем обоюду острым вся козни его рассекий, / и помазания полный сосуд Тихон, / тихостию словес своих грешника к покаянию призвавый. / О велицыи трие святителие земли Российския, / молите Христа Бога, Емуже угодни бысте, / спастися душам нашим.

256. Дионисию, архиеп. Суздальскому, глас 8:

Православия ревнителю, благочестия наставниче, / ищущим спасения добрый кормчий, / монашествующих Богодухновенное украшение, / Богоноснаго Евфимия собеседниче, святителю Дионисие, / ученьми и добродетельми отечество твое просветил еси, / не забуди нас, чтущих тя, / но в мире управи живот наш.

257. Донату, еп. Еврии, глас 4:

Блажен делатель и украситель Церкве Христовы, / отче Донате, был еси, / непрестанно попечение о стаде твоем стяжав, / научая и руководя оно в любви Сына Божия, / не токмо бо в твоем граде многий народ, / но в Константинополе самодержца и в нем вся люди / удивил еси / православными чудесы твоими. / Богоугодныя убо мольбы / сотворяя ко Христу Богу, / помощник скор всем явися, / предстоя Всесвятей Троице, / в Вышних моли Ю о всех нас, / да спасет души наша.

258. Евстафию I, архиеп. Сербскому, глас 4:

Избран от Бога, возлюблен от людей, архиереов Божественная красото, / отче Евстафие, Ангелов сослужителю, / тайн же Божественных проповедатель был еси, / темже моли Христа Бога со всеми святыми / избавитися от всяких зол / молитвами твоими, блаженне, / и спастися нам, / чтущим любовию святую память твою.

259. Евфимию, патриарху Болгарскому, глас 4:

Подвигом пустынным просиял еси / и на престол первосвятительства по достоянию возшел еси, / отонудуже лучами Боговедения и добродетели всех озарил еси / и чашу мученичества безкровно отпил еси. / Ныне же предстоя престолу Горняго Иерусалима, Евфимие, / моли седящаго на нем Христа Бога нашего / о почитающих честную память твою.

260. Евфимию, архиеп. Новгородскому, чдтв., глас 4:

Избран быв Богови от юности, / святителю Евфимие, / и сего ради архиерейства саном почтен быв, / упасл еси люди, иже тебе Богом врученныя; / темже и по преставлении чудес дарования от Господа приял еси / исцеляти различныя недуги. / Того моли о нас, / совершающих честную память твою, / да тебе вси непрестанно ублажаем.

261. Ефрему, патриарху Сербскому, глас 8:

Патриархов великое удобрение,/ святителем красото, монахом правило, / пустынником славу, милости подателя, разсуждения светильника, / сошедшеся, вернии, восхвалим, / кротости учителя, Божественнаго рачителя, / премудраго архипастыря, великаго святителя и отца, / Ефрема, Патриарха Сербскаго, / звезду, темныя люди просвещающую / и вся верныя озаряющую. / Темже, притекающе к раце мощей его, / любовию целуем я и вопием: / святе святый, непрестай молити Христа Бога / спастися душам нашим.

262. Иакову, еп. Ростовскому, глас 4:

Избран от юности Богови быв, / святителю Иакове, / сего ради архиерейства саном почтен, / упасл еси люди, яже тебе Богом врученныя. / Темже и по преставлении / чудес дарования от Бога приял еси/ исцеляти различныя недуги. / Моли о нас, совершающих честную память твою, / да тебе непрестанно величаем.

263. Игнатию Брянчанинову, еп. Кавказскому и Черноморскому, глас 8:

Православия поборниче, / покаяния и молитвы делателю и учителю изрядый, / архиереев Богодухновенное украшение, / монашествующих славо и похвало, / писании твоими вся ны уцеломудрил еси. / Цевнице духовная Игнатие богомудре, / моли Слова Христа Бога, / Егоже носил еси в сердце твоем, / даровати нам прежде конца покаяние.

264. Игнатию, еп. Ростовскому, глас 4:

Благоверия просвещся учении, / святительства прием паству / и апостолов наследник быв, / тем приял еси от Бога дар чудес, святителю отче Игнатие, / моли Христа Бога, / да спасет души наша.

265. Илариону, еп. Меглинскому, глас 3:

Чудо явився извещения, / делы возсиял еси добродетелей Божиих, / монашествующих лики упасл еси, / архиерейская седалища изчистил еси, / еретическаго же нападания не усумневся, / церкви Христовы воздвигл еси, / преподобне Иларионе, / умер, яко спя, / тело же твое цело и нетленно соблюдено бысть, / и подает цельбы болящим от различных недуг, / и демоны прогоняет, / сего ради молим тя: / моли спастися душам нашим.

266. Илариону, митр. Суздальскому, глас 5:

Воспойте убо, вси людие, / в Триех Ипостасех Единаго Бога, / на Небесех непостижно пребывающаго, / мановением же всяческая управляющаго, / на землю же щедротно призирающаго, / в пустынном же пребывающаго противу невидимых врагов, / угодника Своего преподобнаго Илариона укрепльшаго, / того молитвами, Боже, помилуй и спаси нас.

267. Иннокентию, еп. Иркутскому, глас 3:

Светильниче Церкве пресветлый, / озаривый лучами доброт твоих страну сию, / и исцеленьми многими притекающих к тебе с верою / Бога прославивый, / молим тя, святителю Иннокентие, / ограждай молитвами твоими град сей / от всех бед и печали.

268. Иннокентию, митр. Московскому, глас 1:

Во вся страны полунощныя изыде вещание твое, / яко приемшия слово твое, / ихже боголепно научил еси, / неведущия Христа светом Евангелия просветил еси, / человеческия обычаи украсил еси, / Российская похвало, святителю отче наш Иннокентие, / моли Христа Бога / спастися душам нашим.

269. Иннокентию, архиеп. Херсонскому, глас 4:

От юных лет прилежа учению благочестия и страху Божию, / во благодати Христовой преуспевая, / стяжал еси словесная дарования / и явился еси неутомимый проповедниче спасения, / души верных озаряя спасительными смыслы / и приводя всех ко исправлению. / Святителю отче Иннокентие, / моли Христа Бога / дати нам оставление грехов и велию милость.

270. Иоанну Златоусту, архиеп. Константинопольскому, глас 8:

Уст твоих, яко же светлость огня возсиявши, благодать / вселенную просвети: / несребролюбия мирови сокровища сниска, / высоту нам смиренномудрия показа, / но, твоими словесы наказуя, отче Иоанне Златоусте, / моли Слова Христа Бога спастися душам нашим.

271. Иоанну Милостивому, патриарху Александрийскому, глас 8:

В терпении твоем стяжал еси мзду твою, отче преподобне, / в молитвах непрестанно терпевый, / нищия возлюбивый и сия удовливый, / но молися Христу Богу, Иоанне милостиве, блаженне, / спастися душам нашим.

272. Иоанну, архиеп. Новгородскому, глас 8:

Днесь светло красуется славнейший великий Новград, / имея мощи твоя в себе, святителю Иоанне, / яко солнечныя лучи испущающия, / и подающия исцеления, притекающим с верою к тебе. / Молися Христу Богу, избавити град сей невредим от варварскаго пленения, / и междоусобныя брани, и огненнаго запаления, / святителю Богомудре и чудоносче, / небесный человече, и земный ангеле: / да сошедшеся любовию в память твою, / светло празднуем, в песнех и пениих радующеся, / и Христа славяще, тебе таковую благодать даровавшаго исцелений, / и великому Новуграду заступление и утверждение.

273. Иоанну, еп. Суздальскому, глас 8:

Управляя Церковь Божию Соборную и Апостольскую, / соблюдая заповеди Божия, / вельми добре упас стадо словесных овец; / зломысленным церковником молитвою своею прозрети повеле, / и научи, якоже прежде святый Леонтий, / поспешник спасению Русския земли, учитель Ростовский, / прежде связа и паки благослови; / тако святый епископ Суждальский, / напастем, притекающим к тебе, избавниче, чудотворче Иоанне, / моли Христа Бога спастися душам нашим.

274. Иоанну, митр. Тобольскому, глас 8:

Наставниче благочестия, / сиротствующих питателю, / скорбящих утешителю, недугующих врачу безмездный, / душею страждущих скорый помощниче, / теплый молитвенниче о всех ко Господу, / святителю отче Иоанне, / моли Христа Бога спастися душам нашим.

275. Иоанну и Феодору, епп. Суздальским, глас 8:

Яко апостолом единонравных учителей Суждальския страны, / и целителей душ и телес премудрых, / и служителей Богу благоприятных, / к ракам честных мощей ваших притекающе, / ублажаем вас, святителие Богоблаженнии, Феодоре и Иоанне, / в песнех же и пениих, радующеся, славим Христа, / даровавшаго вам благодать исцелений / и граду нашему Суждалю великое в вас утверждение.

276. Иоанну (Максимовичу), архиеп. Шанхайскому и Сан-Францисскому, глас 5:

Попечение твое о пастве в странствии ея, / се прообраз и молитв твоих, за мир весь присно возносимых: / тако веруем, познав любовь твою, святителю и чудотворче Иоанне! / Весь от Бога освящен священнодействием пречистых Тайн, / имиже сам присно укрепляем, / поспешал еси ко страждущим, целителю отраднейший. / Поспеши и ныне в помощь нам, всем сердцем чтущим тя.

277. Иоасафу, еп. Белгородскому, глас 3:

Святителю Христу Богу возлюбленне, / правило веры и образ милосердия людем был еси, / бдением же, постом и молитвою, / яко светильник пресветлый, просиял еси / и прославлен от Бога явился еси: телом убо в нетлении почивая, / духом же Престолу Божию предстоя, / чудеса преславная источаеши. / Моли Христа Бога, / да утвердит нас в Православии и благочестии / и спасет души наша.

278. Иову, патриарху Московскому и всея Руси, глас 3:

Да торжествует Церковь Христова / и да радуется град Москва, / яко возсия светильник земли Российския, / во исповедании истины непоколебимый Иов Патриарх, / егоже молитвами. Господи, / вся соблазны мира сего и ереси искорени, / люди во благочестии настави / и утверди в Православии.

279. Ионе, еп. Великопермскому, глас 4:

Святителю Церкви Великопермстей, / истинный хранителю апостольских преданий, / столпе непоколебимый Православия, / благочестия учителю, / Ионо святителю блаженне, / Владыку всех моли / мир пастве твоей / и всей Русстей земли даровати / и всем нам спастися.

280. Ионе, митр. Московскому и всея России, чдтв., глас 3:

Ярем Господень измлада восприим, / и Того стопам невозвратным желанием последовал еси, / и освященнаго подвига достигл, / святительства паству приим и чудес от Бога дары прият, / с верою приходящим к раце мощей твоих / подаеши различным недугом исцеление неоскудно, / отче наш Ионо, святителю Христов, /моли Христа Бога даровати нам велию милость.

281. Тому же святому (Перенесение мощей), глас 4:

От юности твоея весь сам себе Господеви возложив, / в молитвах, и трудех, и в постех образ быв добродетели, / отонудуже видев Бог твое благое произволение, / архиерея тя и пастыря Церкви Своей устрояет. / Темже и по преставлении честное тело твое цело и нетленно соблюдеся, / Ионо святителю, / моли Христа Бога да спасет души наша.

282. Ионе, архиеп. Новгородскому, глас 4:

Исправление веры, и образ кротости, / и якоже сад посреде рая, / преподобными делы твоими мир просвещаеши, и сего ради к мощем твоим любовию прикасаемся и верно вопием: / предстани в помощь воспевающим память твою светоносную, отче Ионо, / и моли спастися душам нашим.

283. Исаии, еп. Ростовскому, чдтв., глас 2:

В иноцех святыя лавры Печерския / благоискусен показавыйся / и во архиерейстем сане добр пастырь / своему стаду, Боголюбезне Исаие, бывый, / моли о нас Пастыреначальника Христа Бога / да помилует и спасет души наша.

284. Иувеналию, патриарху Иерусалимскому, глас 4:

Брата Божия на престоле архиерейства преемниче, / святаго града Иерусалима иерарше достохвальне, / с богомудрыми отцы в Халкидоне изъяснил еси воплощение Сына Божия, / пришедшаго мир обновити и обожити вся человеки, / в Церкви Его с Ним сочетавшаяся, / святителю отче Иувеналие, / предстоя ныне во Царствии Отца светов, / о почитающих тя любовию молися, / да мир и милость Спасова будет с нами.

285. Киприану, митр. Московскому, всея России чудотворцу, глас 4:

Иже от Бога свыше Божественною благодатию совершен / и благими нравы украшен, / Духом Святым просвещен, / совершив святыню в страсе Божий, / сподоблен бысть благодати Божественнаго Духа, / пасый Церковь Божию Русския митрополии, / постом вся поборая, волнение претерпе, / гонение преминув, святаго Петра митрополита всегда себе в помощь призывая, / и сего помощника имея, / и того стопам последуя. / Служитель благоприятный, / заповеди Божия соблюдая, / Духом Божиим наставляемь, / просвещая верныя люди учением словес твоих, / пощением украси житие свое, / ярем Господень измлада восприимь, / и паче всех Христа возлюби. / Того ради и архиерейским седалищем почтен, / и, яко светозарное солнце, от Сербския земли происшед, / и по вся концы Русския земли добродетелию просияв, / светило явися мирови, / и преставися ко Господу от сея жизни в вечный покой, / великий архиерею Божий, Киприане митрополите, / учителю и наставниче Русския земли, / всегда предстоя Престолу Пресвятыя Троицы, / моли Господа прилежно об архиереех и о всех христианах, / да спасет тебе ради души наша.

286. Киприану, Фотию и Ионе, митр. Московским и всея Руси (Перенесение мощей), глас 8:

Яко Светлаго Солнца светозарныя звезды, / Троическим Светом озаряете сердца верных, / пренесением честных мощей ваших, / Троицы сосуди явистеся чистии вашим житием, / и научисте люди твердо вере Христове, / и скверну отгнасте вашими святыми заповедьми, / и упасосте добре Христово стадо, порученное вам, / Богомудре Киприане, со славным Фотием и со Ионою твердым, / молитеся Христу Богу, да спасет души наша.

287. Кириллу, архиеп. Александрийскому, глас 8:

Православия наставниче, / благочестия учителю и чистоты, / вселенныя светильниче, / архиереев Богодухновенное удобрение, / Кирилле премудре, / ученьми твоими вся просветил еси, / цевнице духовная, / моли Христа Бога спастися душам нашим.

288. Кириллу, еп. Туровскому, глас 4:

Благочестия ревнителю и рачителю, / иноков и столпников похвале, / святителю Туровския паствы, преславне,/ златословесный учителю, / светлым учением богоразумия своего просветивый концы русския, / в молитве к Богу благодатный грешников споспешниче, / Кирилле Богомудре, моли Христа Бога / утвердитися нам, соотечественником твоим, / во Православии, благочестии и единомыслии.

289. Константину, митр. Киевскому и всея России, блж., глас 4:

Апостолов преемниче,/ архиереев сопрестольниче, / России всея пастырю и учителю, / всеблаженне отче Константине, / Владыце всех молися / мир пастве твоей даровати / и спасение душам нашим и велию милость.

290. Леонтию, еп. Ростовскому, глас 4:

Апостолом сопричастник / и к Богу молебник верен, / добродетельми возшед на Небесная, / и любовь возложил еси к Любящему тя, / и неверныя люди обратил еси в веру. / Тем ныне, со Ангелы ликуя, / предстоиши престолу славы всех, Царя Христа Бога: / молися, святителю Леонтие, / да спасет души наша.

291. Луке (Воино-Ясенецкому), архиеп. Крымскому, исп., глас 1:

Возвестителю пути спасительного, / исповедниче и архипастырю Крымския земли, / истинный хранителю отеческих преданий, / столпе непоколебимый, Православия наставниче, / врачу богомудрый, святителю Луко, / Христа Спаса непрестанно моли / веру непоколебиму православным даровати / и спасение, и велию милость.

292. Льву, папе Римскому, глас 8:

Православия наставниче, / благочестия учителю и чистоты, / вселенныя светильниче, архиереев Богодухновенное удобрение, / Льве премудре, / ученьми твоими вся просветил еси, цевнице духовная. / Моли Христа Бога спастися душам нашим.

293. Макарию, митр. Московскому, глас 4:

Яко великим пастырем единонравна, / и учителем вселенныя единомысленна, / Божий Премудрости служителя изрядна, / иже блаженству тезоимениту, днесь, вернии, вси воспоим: / Христа Бога моли, / святителю Макарие, / умирити мир и спасти души наша.

294. Максиму Новому, бывшему деспоту Сербскому, глас 3:

Странное рождение и воспитание был еси отче, / но паки водворися во власти у своего народа, / Небеснаго Царствия желая, / земное царствие оставил еси / и смирением Вышнее сокровище получил еси, / преблаженне Максиме, / моли, молимся, о душах наших.

295. Марку, архиеп. Ефесскому, глас 8:

Православия наставниче, новшеств противоборниче, / степень веры, Церкве светильниче, / учителей Богодухновенная печате, Марко всемудре, / писании твоими вся просветил еси, цевнице духовная, / моли Христа Бога спастися душам нашим.

296. Мартину Исповеднику, папе Римскому, глас 4:

Истинных повелений устне распространил еси, / зловерие низложил еси, Богомудре Мартине, / святителю всечестне, / поминай нас, угодниче Христов, / еже к Нему ходатайствы твоими, / да в мире устроиши живот наш.

297. Мелетию, архиеп. Харьковскому, глас 4:

Мира сего временная, яко преходящая уразумел еси, / от юности постническое и многотрудное житие возлюбил еси, всеблаженне, / иерархов славо и преподобных похвале, / Предвечнаго Слова усердный благовестниче, / сирых и неимущих крове и прибежище. / Темже в молитвах пребывая, Христу утреневати прилежал еси / и, Сего взыскуя, венец неувядаемый со всеми святыми стяжал еси, / отче наш, святителю Мелетие, / моли Христа Бога спастися душам нашим.

298. Митрофану, еп. Воронежскому, глас 4:

Правило веры и образ кротости / словом и житием пастве твоей, отче смиренномудре Митрофане, был еси. / Темже и во светлостех святых / солнца светлейше возсиял еси, / венцем нетления и славы украшаемь, / моли Христа Бога / стране нашей и граду твоему в мире спастися.

299. Михаилу, первому митр. Киевскому, глас 4:

Днесь пророчествие во апостолех Первозваннаго исполнися: / се бо на сих горах возсия благодать и вера умножися. / И иже неверием обветшавший / Божественною купелию отродишася / и быша людие обновления, / царское священие, язык свят, Христово стадо, / емуже ты первый пастырь явился еси, / яко первее Крещением послуживый. / И ныне, предстоя Владыце Христу Богу, / моли всем сыном русским спастися: / имаши бо дерзновение яко иерарх Божий и священнослужитель.

300. Модесту, архиеп. Иерусалимскому, глас 4:

Преподобно пожив, Богомудрие Модесте, / и святительскою одеждою украшен, / пастырю Иерусалима блаженнейший, / в веселии ныне Христу предстоиши / и концы озаряеши чудесы, / помощник убо буди тя призывающим, / моляся, отче, о всех нас.

301. Моисею, архиеп. Новгородскому, глас 8:

Чистоты ради жития твоего, / пощения же, и молитв, и трудов, / сосуд благопотребен был еси Владыце Христу, / Иже дарова тя стаду твоему, / яко сокровище неотъемлемо, чудесы всех обогащающа. / Тем и мы, сошедшеся в память твою, / верою и любовию вопием: / моли о нас, пречестный архиерею Моисее, отче наш.

302. Нектарию Эгинскому, митр. Пентапольскому, глас 4:

Преподобнически пожив, яко мудрый иерарх, / прославил еси Господа / добродетельным житием, Нектарие преподобне. / Темже, Утешителя прославлен силою, / Божественными мощми твоими, / демоны отгониши и болящия исцеляеши, / верою приходящия ти. /

303. Никите, Затворнику Печерскому, еп. Новгородскому, глас 4:

Насладився, богомудре, воздержания / и желание плоти твоея обуздав, / на престоле святительства сел еси, / и яко звезда многосветлая, просвещая верных .сердца / зарями чудес твоих, отче наш, святителю Никито, / и ныне моли Христа Бога, / да спасет души наша.

304. Нифонту, патриарху Константинопольскому, глас 3:

Делы просиял еси благочестия, / высокотворным смирением украшаемь, / Афона похвало, патриархов удобрение, / Нифонте славне, / молися о нас, любовию славящих тя.

305. Нифонту, еп. Новгородскому, глас 3:

Яко сый нравом православных / Восточныя Церкве преданий истинный защитник, / сподобился еси великаго во отцех Феодосия / видети по смерти яко жива, / возвещающа тебе Царствия Небеснаго наследие, / егоже неизреченных доброт / ныне с ним неразлучно наслаждаяся, / моли и о нас, чадех своих, Нифонте прехвальне.

306. Павлу, патр. Константинопольскому, исп., глас 3:

Божественныя веры исповеданием / другаго Павла тя Церковь, ревнителя во священницех, показа, / свозопиет ти и Авель ко Господу, / и Захариина кровь праведная. / Отче преподобне, Христа Бога моли / дароватися нам велией милости.

307. Павлу, митр. Тобольскому, глас 3:

Прославим, вернии, благочестие возлюбившаго / и от юности иго Христово усердно восприимшаго, / ревностнаго святителя Церкве Российския, / в Богоспасаемом граде Тобольске подвизавшагося. / Ты же, Богомудре отче Павле, / телом убо в нетлении почивая, / духом же Престолу Божию предстоя, / моли спастися всем нам.

308. Петру, митр. Московскому, всея России чудотворцу, глас 4:

Яже прежде безплодная, земле, ныне веселися: / се бо Христос светильника в тебе показа, / яве сияюща в мире / и исцелевающа недуги и болезни наша. / Сего ради ликуй и веселися со дерзновением: / святитель бо есть Вышняго, / сия соделоваяй.

309. Тому же святому,(Перенесение мощей), глас 4:

Наста днесь всечестный праздник / пренесения честных мощей твоих, святителю Петре, / веселя изрядно твое стадо, / и верное отечество, и люди, / о нихже не оскудевай, моляся Христу Богу, / еже от Него дарованной ти пастве сохранитися от враг ненаветованней / и спастися душам нашим.

310. Питириму, еп. Великопермскому, глас 8:

Православия наставниче, / благочестия учителю и милости сокровище, / архиереев украшение, / людей зырянских наставниче, / святителю Питириме, / душу свою за Христа положивый, / моли Единаго Человеколюбца о пастве твоей и о всех / любовию чтущих память твою.

311. Питириму, еп. Тамбовскому, глас 4:

Веры и благочестия наставниче, / Церкве светильниче, монашествующих образе, / святителю Питириме премудре, / стадо твое благочестно упасл еси / и ко Христу привел еси, / темже в Вышних венцем славы украшен, / с нами на земли духом пребываеши, сияя чудесы. / Моли Христа Бога / спастися душам нашим.

312. Порфирию, архиеп. Газскому, глас 4:

Труды и болезни твоя, яже по благочестию, / кто исповесть, отче? / день бо и ночь не престал еси трудяся, / дондеже от нечестия Газу очистив, благочестие насадил еси, / тем яко всегда еси предстатель о стаде твоем, / тако, святе Порфирие, / моли Христа Бога да спасет души наша.

313. Проклу, архиеп. Константинопольскому, глас 4:

Иже Божественным началом премудрости, / страхом Господним утверждся, / оттуду священными восхождении возшел еси / во ученичество Златоуста, / и архиерейскаго того престола достоин быв чистоты добротами, / апостольским правилом себе вообразив, / не себе живый, но Христу и стаду твоему. / Тем в нетленный живот апостольски вселился еси, / иерарше Прокле, / моли Христа Бога / спастися душам нашим.

314. Савве I, архиеп. Сербскому, глас 3:

Пути, вводящаго в жизнь, / наставник, и первопрестольник, и учитель был еси: / первее бо пришед, святителю Савво, / отечество твое просветил еси / и, породив тое Духом Святым, / яко древа маслинная, / в мысленном рай насадил еси всеосвященная твоя чада. / Тем, яко апостолом и святителем сопрестольна / чтуще тя, молим: / моли Христа Бога / даровати нам велию милость.

315. Савве II, архиеп. Сербскому, глас 4:

Исправление веры и образ кротости, / и якоже сад посреде рая, / преподобными делы твоими мир просвещаеши, / сего ради к честней раце мощей твоих любовию прикасаемся, / лобызаем их и верно вопием: / предстани в помощь воспевающим память святую твою и светоносную, / святителю отче Савво пребогате, молимся, / Христу Богу молися / спастися душам нашим.

316. Серапиону, архиеп. Новгородскому, глас 8:

Твердый адамант воистинну, отче, показался еси, / во всем подобяся Владыце своему и Господу, / неправедная изгнания, радуяся, претерпел еси, / темже и Христос святителем и мучеником сликовна тя сотвори / и дарова тя стаду твоему, яко сокровище неотъемлемо, / чудесы всех обогащающее, / яко да и мы, сошедшеся к раце мощей твоих, / любовию вопием ти: / о великий во святителех и дивный во страдальцех / пречестный архиерею, Серапионе отче наш, / моли о нас всеблагаго Бога, / да спасет души наша.

317. Симону, еп. Владимирскому и Суздальскому, глас 1:

Житий преподобных отец Печерских списателю известный, / святителю Христов Симоне всеблаженне, / молися прилежно с ними Христу Богу, / да управит в мире живот наш /и в книги животныя да напишет ны, / спасая души наша.

318. Софронию, еп. Врачанскому (Болг.), глас 1:

Щитом веры вооружився, / мечем словесе безбожныя агаряны посекая, / стадо твое упасл еси на земли. / В Небесней же обители вселився, / Христа моли даровати народу нашему / мир и велию милость.

319. Софронию, еп. Иркутскому, глас 4:

От юности Христа возлюбил еси, блаженне Софроние, / добре управил еси иноческия обители / и, архиерейства саном почтен быв, / упасл еси Иркутскую паству, / темже и по преставлении дарования чудес от Бога приял еси / и молиши Христа Бога / избавити нас от бед и спасти души наша.

320. Спиридону, еп. Тримифунтскому, чдтв., глас 1:

Собора Перваго показался еси поборник и чудотворец,/ Богоносе Спиридоне, отче наш. / Темже мертву ты во гробе возгласив, / и змию в злато претворил еси, / и внегда пети тебе святыя молитвы / Ангелы, сослужащия тебе, имел еси, священнейший. / Слава Давшему тебе крепость, / слава Венчавшему тя, / слава Действующему тобою всем исцеления.

321. Стефану, еп. Великопермскому, глас 4:

Божественным желанием, / от юнаго возраста, Стефане премудре, разжегся, / ярем Христов взял еси / и людей оляденевшая древле неверием сердца, / Божественное семя в них сеяв, / евангельски духовне породил еси. / Темже преславную твою память почитающе, молим тя: / моли, Егоже проповедал еси, / да спасет души наша.

322. Стефану Исповеднику, архиеп. Сурожскому, глас 4:

Яко святитель со Безплотными единожитель быв, / священномучениче Стефане, / восприем бо Крест яко оружие, / и став крепко сопротив иконоукорителя и духоборцев, / не покланяющихся пречистому образу Христа Бога нашего, / и отсекл еси всяку ересь лукавых. / Того ради прием мучения венец, / избавил еси град твой Сурож от всякия неприязни. / И ныне молим тя, святе, / да избавиши нас от всяких злых искушений, и бед, / и вечныя муки.

323. Тихону, еп. Амафунтскому, глас 1:

Пустынный житель, и в телеси ангел, / и чудотворец явился еси, Богоносе отче наш Тихоне: / постом, бдением, молитвою Небесная дарования приим, / исцеляеши недужныя и души верою притекающих ти. / Слава Давшему тебе крепость, / слава Венчавшему тя, / слава Действующему тобою всем исцеления.

324. Тихону, еп. Воронежскому, Задонскому чудотворцу, глас 4:

Православия наставниче, благочестия учителю, / покаяния проповедниче, Златоустаго ревнителю, / пастырю предобрый, / новый России светильниче и чудотворче, / паству твою добре упасл еси / и писаньми твоими вся ны наставил еси, / темже венцем нетления / украшен от Пастыреначальника, / моли Его спастися душам нашим.

325. Тихону, патриарху Московскому и всея Руси, глас 3:

В годину тяжкую Богом избранный / в совершенной святости и любви Бога прославил еси, / во смирении величие, в простоте и кротости силу Божию являя, / положил душу за Церковь, за люди своя, / исповедниче патриарше святе Тихоне, / моли Христа Бога, / Емуже сораспялся еси, / и ныне спасти землю Русскую и паству Твою.

326. Тому же святому (Прославление), глас 1:

Апостольских преданий ревнителя / и Христовы Церкве пастыря добраго, / душу свою за овцы положившаго, / жребием Божиим избранного / Всероссийскаго Патриарха Тихона восхвалим / и к нему с верою и упованием возопиим: / предстательством святительским ко Господу / Церковь Русскую в тишине соблюди, / расточенная чада ея во едино стадо собери, / отступившия от правыя веры к покаянию обрати, / страну нашу от междоусобныя брани сохрани / и мир Божий людем испроси.

327. Феодору, еп. Едесскому, глас 4:

Неволею паству святительскую приим, / но волею подвигнувся о Божий Церкви, / и перстию Христова гроба невернаго Моавия царя уверив, / и с телесною слепотою вкупе и душевную ему исцелив, благоверна показа, / с нимже и еретики от Божия Церкве, яко волки, отгнав, / честный святителю Феодоре, / моли спастися душам нашим.

328. Феодору, архиеп. Ростовскому, глас 5:

От юности, премудре, прилежно подвизався, / и извещением Святаго Духа / превеликую обитель воздвиже Пресвятей Богородице / в похвалу Рождества Ея, / струями же слез твоих безплотныя враги погрузил еси, / и, жития твоего целомудрием со Ангельскими лики совокупився, / преподобне отче Феодоре, / с ними же Христа Бога моли / спастися душам нашим.

329. Феодору, еп. Суздальскому, глас 8:

В молитвах бдя, сердцем же о стаде твоем выну болезнуя, / учением своим всех просветил еси, Феодоре премудре, / темже Христа Бога моли, / в день памяти твоея даровати нам велию милость.

330. Феодосию, архиеп. Черниговскому, глас 4:

Преудобрен во архиереех, святителю Феодосие, / был еси светило своему стаду, / таже преставился еси в вечныя Обители. / Умоли у Престола Царя Славы избавитися нам от находящих на ны зол / и спастися душам нашим, святе, молитвами твоими.

331. Феоктисту, архиеп. Новгородскому, глас 3:

Божия Слова Премудрости изрядный служитель, / Ангельскаго жительства истинный подражатель, / Божественныя чистоты рачитель, / архиереом сопрестольниче, преподобным сожительниче, / пастырская красота, / Великому Новуграду похвала, / святителю пречестный Феоктисте, отче наш, / Емуже, Слову Божию, в житии сем послужил еси, / моли спастися душам нашим.

332. Феофану, Затворнику Вышенскому, еп., глас 8:

Православия наставниче, / благочестия учителю и чистоты, / Вышенский подвижниче святителю Феофане богомудре, / писаньми твоими Слово Божие изъяснил еси / и всем верным путь ко спасению указал еси, / моли Христа Бога спастися душам нашим.

333. Филарету, митр. Московскому, глас 4:

Духа Святаго благодать стяжав, / богомудре святителю Филарете, / истину и правду разумом просвещенным / людем проповедал еси, / мир и милость сердцем умиленным / страждущим явил еси, / яко учитель веры и страж неусыпный / паству Российскую жезлом правости сохранил еси. / Сего ради ко Христу Богу дерзновение имея, / моли даровати Церкве утверждение, / людем и душам нашим спасение.

334. Филиппу I, митр. Московскому, глас 3:

Чудо явися, извещением и делы возсияв, / Духа Святаго произбранием святительства паству приим, / откровением Божиим церковь разобра / и величайшую воздвиже, / всечестне Филиппе, святителю великий, / мир граду даруй нашему Москве / и велию милость.

335. Филиппу II, митр. Московскому и всея России чудотворца, глас 8:

Первопрестольников преемниче, столпе Православия, / истины поборниче, новый исповедниче, святителю Филиппе, / положивый душу за паству твою. / Темже яко имея дерзновение ко Христу, / моли за град же и люди, чтущия достойно светлую память твою.

336. Тому же святому (Перенесение мощей), глас 5:

Радостный возсия день светлаго торжества: / днесь церковная расширяются недра, / приемлюще духовных даров неоскудеемо боготворное сокровище, / струю благодатей неисчерпаемую, / источника чудесем обильна, / чудотворивыя и священныя мощи твоя, / святителю Филиппе. / Темже моли прославившаго тя Дародателя Христа Бога / о воспевающих тя / и кланяющихся священным мощем твоим.

337. Фотию, митр. Киевскому и всея Руси, глас 4:

Словес евангельских послушателю / и Божественных учений рачителю, / премудрый наказателю, / всегда страху Господню поучаяйся, / в молитвах к Богу простираяйся, / заградителю уст кривоглаголющим слово правыя веры, / апостолом сопричастниче, / вере Христовой утвердителю, / пророчески вещателю, святителю Фотие, / моли Христа Бога / умирити мир и спасти души наша.